"Zindagi Na Milegi Dobara" poems

Yesterday we watched ZNMD and I was totally blown away by the poetry in the movie. Hats off to Javed Akhtar for writing these proses and to Farhan Akhtar for delivering them so beautifully and effortlessly! Without further ado, below are the pieces of poetry from the movie:

Poem 1:

Ik baat honton tak hai jo aayi nahin

Bas ankhon say hai jhaankti

Tumse kabhi, mujhse kabhi

Kuch lafz hain woh maangti

Jinko pehanke honton tak aa jaaye woh

Aawaaz ki baahon mein baahein daalke ithlaye woh

Lekin jo yeh ik baat hai

Ahsas hi ahsas hai

Khushboo si hai jaise hawa mein tairti

Khushboo jo be-aawaaz hai

Jiska pata tumko bhi hai

Jiski khabar mujhko bhi hai

Duniya se bhi chupta nahin

Yeh jaane kaisa raaz hai

Poem 2:

Jab jab dard ka baadal chaya
Jab ghum ka saya lehraya
Jab aansoo palkon tak aya
Jab yeh tanha dil ghabraya

Humne dil ko yeh samjhaya
Dil aakhir tu kyun rota hai
Duniya mein yunhi hota hai

Yeh jo gehre sannate hain
Waqt ne sabko hi baante hain
Thoda ghum hai sabka qissa
Thodi dhoop hai sabka hissa

Aankh teri bekaar hi nam hai
Har pal ek naya mausam hai
Kyun tu aise pal khota hai
Dil aakhir tu kyun rota hai

Poem 3:

Pighle neelam sa behta ye sama,
neeli neeli si khamoshiyan,
na kahin hai zameen na kahin aasmaan,
sarsaraati hui tehniyaan pattiyaan,
keh raheen hai bas ek tum ho yahan,
bas main hoon,
meri saansein hain aur meri dhadkanein,
aisi gehraiyaan, aisi tanhaiyaan,
aur main… sirf main.
Apne hone par mujhko yakeen aa gaya.

Poem 4:

Dilon me tum apni betabiyan leke chal rahe ho,to zinda ho tum
Nazar me khwaabon ki bijliyan leke chal rahe ho,to zinda ho tum

Hawa ke jhokon ke jaise aazad rehna seekho

Tum ek dariya ke jaise lehron mein behna seekho

Har ek lamhe se tum milo khole apni baahein

Har ek pal ek naya sama dekhe nigahein

Jo apni ankhon mein hairanian leke chal rahe ho,to zinda ho tum
Dilon mein tum apni betabian leke chal rahe ho,to zinda ho tum